De la 5-a ĝis la 8-a de januaro 2006 okazis en Slovakio la 24-a renkontiĝo de esperantaj vojaĝantoj kaj supreniro al montopinto Poludnica (montaro Malaltaj Tatroj).

Ĝi estis la plej internacia el ĉiuj okazintaj, kun 73 vojaĝantoj el Aŭstrio, Ĉeĥio, Kroatio, Pollando kaj Slovakio. 44 el ili supreniris en bela suna vetero sur la pinton kaj pliamasigis Esperanto-obon (ŝtonan piramidon) per 34,5 kg da ŝtonoj el diversaj anguloj de la mondo. Al la plej interesaj apartenis ŝtonoj el Morta Maro, Bajkalo, rivero Lena, akvofaloj Igauazú, el Suda Afriko, montaro Velebit, el Čina muro ktp. La plej pezan alportis Vladimír Škuta – prezidanto de Liptova Esperanto-klubo. Ĝi pezis 7,47 kg kaj estis el monto Žuty kuk el Kroatio.

Ĉiutage de ĵaŭdo ĝis dimanĉo estis prezentataj prelegoj pri vojaĝoj. Tradicie ĉefaj punktoj de la prelegprogramo estis okazaĵoj kiuj rilatas al Esperanto. Krom prelegoj estis prezentitaj filmoj kun turisma temo.

Al akompana programo apartenis vizitoj de grotoj Libereco kaj Stanišovská, vizito de Slovaka muzeo de naturprotektado kaj speleologio, historia ekskurso tra turisma civito Liptovský Ján kaj ĝiaj varmaj mineralaj akvofontoj. Tuj post descendo el la montopinto granda parto de la partoprenantoj refreŝiĝis en baseno kaj saŭno.

(Transprenite el La Ondo de Esperanto 3/2006)

---

Vidu ankaŭ fotogalerion