Karaj Amikoj,

Iun tagon Ulrich Lins proponis al LG artikolon de Jean Amouroux pri du aktivaj esperantistoj Georgo Salan kaj Gregoro Demidjuk; la unuan mi iom konis persone, la duan nur laŭnome. La artikolo aperis en LG121 de 15 decembro 2005. Tri monatojn poste - ja LG vojaĝas helike ĝis Siberio! - ni ricevis de Anatolo Gonĉarov longan retleteron (LG124) okaze de tiu artikolo; en ĝi li menciis iaman intervjuon kun Demidjuk surbendigitan de Detlev Blanke, kaj instigis nin al publikigo. Unu jaro pasis; mi fine ekkuraĝis demandi Detlev Blanke'n pri la sorto de tiu bendo. La sekvon vi legos sub la plumo de Detlev Blanke en ĉi tiu kajero.
Vi pli intime konatiĝos ankaŭ kun la laŭreatoj de OSIEK-Premio 2007: la paro Le Puil / LeQuint.
Eugene de Zilah flankenmetis siajn kutime eseajn "vortojn"; li elektis la rakontan ĝenron por prezenti trajtojn de la forgesita civilizacio (en LG112).
Do ne plu restis loko por leteroj, recenzoj, ludoj, nek por la jarfina indekso. Tiuj ĉi rubrikoj aperos en LG134. Ricevu plenan garbon da bondeziroj de LG-rondo por 2008.

Madeleine de ZILAH